Heróín oftar nefnt af sprautufíklum á Vogi

„Þetta gæti verið vísbending um að eitthvað sé að breytast. Það segir mikið ef menn hafa áhuga á þessu efni og eru að tala um það, og nefna það í þessari könnun. Þá er það aukin áhætta að það komi, og við vitum ekki hvað þetta táknar. Það gæti táknað undanfara að heróínneyslu, það er ekkert útilokað,“ segir Þórarinn Tyrfingsson, yfirlæknir á Vogi.

SÁÁ hefur frá árinu 2000 kannað verðlag á ólöglegum vímuefnum á götunni. Þar er kannað hvaða vímuefni sjúklingar hafa keypt tvær vikur fyrir innritun og hvað þau kostuðu. Allir sjúklingar sem hafa heilsu til taka þátt í könnuninni sem er talin gefa raunsæja mynd af markaðnum á hverjum tíma. Könnunin vakti á dögunum athygli á aukinni neyslu á sterka verkjalyfinu OxyContin, sem hefur verið mikið vandamál í Bandaríkjunum.

Í nefndri könnun kemur einnig fram að á undanförnum átta mánuðum nefna innritaðir sjúklingar heróín, og hvað það kostar, jafn oft og átta ár þar á undan. Aðeins er um fá skipti að ræða, eða fjögur á þessu ári og fjögur á tímabilinu 2006 til 2013.

Þetta vekur athygli þar sem heróín hefur aldrei verið í umferð á Íslandi svo nokkru nemur, en SÁÁ hefur þó varað við því að það gæti breyst í ljósi fjölgunar sprautufíkla hérlendis. Hefur þetta jafnan verið talið merki um að ólöglegi vímuefnamarkaðurinn á Íslandi væri ekki eins þróaður og ástandið hér miklu betra en hjá nágrannaþjóðum okkar. Allir sérfróðir eru sammála um að ástandið hér mundi versna um allan helming ef heróínfíklar yrðu til á Íslandi, eins og segir á heimasíðu SÁÁ.

Þórarinn tekur samt skýrt fram að ekkert bendi til þess að heróínneysla sé snarlega að aukast þrátt fyrir upplýsingarnar úr könnuninni. Hann útilokar ekki að þeir sem gefa þær hafi nýlega verið erlendis þar sem heróín er viðvarandi vandamál, t.d. í Kaupmannahöfn.

Þórarinn segir að það sem einkennir breytingar á ólöglega vímuefnamarkaðnum síðasta áratuginn sé innkoma vanabindandi lyfja sem læknar ávísa - eða læknadópið.

„Við höfum reyndar lent í faraldri sem er engu betri en heróín, sem er morfínfaraldurinn sem hér gekk yfir, og morfín er talsvert mikið misnotað enn hér á landi,“ segir Þórarinn og vísar til lyfja eins og kontalgíns, sem mikið var í umræðunni hér á landi fyrir skemmstu.