Höfða mál gegn borginni ef flugbraut tefur framkvæmdir

Framkvæmdastjóri Valsmanna hf. segir félagið vilja hefja uppbygginigu á nýju íþróttasvæði og hverfi á Hlíðarenda strax næsta vor. Ef deilur um minnstu flugbraut Reykjavíkurflugvallar tefji framkvæmdirnar muni Valsmenn hefja málaferli við borgina til að verja fjárfestingu sína á svæðinu.

Fyrir um áratug keyptu Valsmenn hf. land við endann á hinni umdeildu NA-SV flugbraut Reykjavíkurflugvallar til uppbyggingar. Spurningin er því hvað taki næst við hjá Valsmönnum?

„Við höldum bara áfram því starfi sem við erum að vinna að. Það er á fullu hönnun. Það eru þrjár verkfræðistofur að vinna að undirbúningi jarðvegsframkvæmda. Við erum að teikna byggingarnefndarteikningar og munum skila þeim fyrir áramót. Þannig að okkar vinna er á fullri ferð í að undirbúa framkvæmdir,“ segir Brynjar Harðarson framkvæmdastjóri Valsmanna hf.

Framkvæmdanefnd svæðisins hefur fengið samþykkt að hefja megi gerð vegar sem á að skilja af íþróttasvæði Vals og væntanlegt byggingarsvæði Valsmanna og borgarinnar. Áætlanir Valsmanna ganga síðan út á að hefja framkvæmdir næsta vor. Brynjar segir lóðasamninga sem þinglýst var á síðasta ári hafa verið kvaðalausa.

„Við viljum auðvitað byrja sem fyrst. Það er að mörgu leyti kraftaverk að við skulum hafa lifað af í tíu ár. Það má ekki gleyma því að skuldir gufa ekki upp og það ættu Íslendingar að hafa lært. Við greiddum hálfan milljarð fyrir landið hinn 11. maí 2005 og þær skuldir erum við búnir að vera með á bakinu í tíu ár. Það er útilokað að hægt sé að bera þann fjármagnskostnað í rauninni deginum lengur,“ segir Brynjar.

Valsmenn hafi ekkert á móti Reykjavíkurflugvelli með tveimur flugbrautum og flugvöllurinn geti starfað áfram  þrátt fyrir byggingu þessa svæðis.

„Valsmenn taka enga afstöðu til flugvallarins og hafa ekkert á móti honum. En það er ekki til að vinna fyrir almannahagsmuni að berjast fyrir þessari braut og stoppa alla uppbyggingu í Reykjavík,“ segir Brynjar.

Reykjavíkurborg geri sér grein fyrir afleiðingum þess ef flugbrautin stöðvi framkvæmdir.

„Ef þessi plön okkar fara í einhverja frestun og við getum ekki staðið við okkar skuldbindingar þá snúum við okkur að sjálfsögðu að Reykjavíkurborg og förum með þann skaða á Reykjavíkurborg. Svo er það Reykjavíkurborgar að fara með skaðann á ríkið ef hún telur svo vera,“ segir Brynjar.

Þú ert að tala um dómsmál?

„Að sjálfsögðu,“ segir Brynjar Harðarson.