Hross í oss vann kvikmyndaverðlaun Norðurlandaráðs

Kvikmyndin Hross í oss vann í dag kvikmyndaverðlaun Norðurlandaráðs. Þetta er í fyrsta sinn sem íslensk kvikmynd hlýtur þessi verðlaun. Reykjavíkurborg fékk náttúru- og umhverfisverðlaun ráðsins. Þetta kemur fram í tilkynningu frá Norðurlandaráði.

Frumleg mynd

Kvikmyndin er eftir Benedikt Erlingsson, leikara og leikstjóra, en þetta er hans fyrsta mynd í fullri lengd. Friðrik Þór Friðriksson framleiddi myndina.

Í rökstuðningi fyrir valinu segir að myndin sé sérlega frumleg með rætur í kjarnyrtum húmor Íslendingasagnanna. „Leikstjórinn hefur djúpan skilning á frumkröftum hrossa og manna,“ segir í rökstuðningnum.

Verðlaunin hafa verið veitt árlega síðan árið 2005 en þau voru fyrst veitt, í tilraunaskyni, árið 2002 á hálfrar aldar afmæli Norðurlandaráðs. Verðlaunaafhendingin fór fram í Stokkhólmi í kvöld.

Aðrir geta lært af Reykjavík

Reykjavíkurborg fékk náttúru- og umhverfisverðlaun Norðurlandaráðs sem einnig voru afhent í kvöld. Verðlaunin nema 350 þúsund danskra króna, jafnvirði 7,3 milljóna íslenskra króna. 

Í rökstuðningi fyrir valinu segir að Reykjavíkurborg hljóti verðlaunin fyrir víðtækt og markvisst starf sveitarfélagsins að umhverfismálum og að borgin hafi gert ýmislegt sem getur orðið öðrum innblástur.

Bent er á að 87 prósent ökutækja borgarinnar gangi fyrir rafmagni eða gasi. „Við vitum ekki af neinum sveitarfélögum sem hafa nálægt því eins umhverfisvænan bílaflota,“ segir í rökstuðningnum.