Hallgrímur Mar samdi við Víking

Pepsi-deildar lið Víkings er byrjað að styrkja sig fyrir átökin næsta sumar, en félagið gekk frá samningi við kantmanninn öfluga Hallgrím Mar Steingrímsson í dag.

Þessi 24 ára gamli Húsvíkingur skrifaði undir þriggja ára samning við Fossvogsfélagið í Víkinni í dag, en þetta verður í fyrsta skipti sem hann spreytir sig í deild þeirra bestu.

Hallgrímur Mar, sem gekk í raðir KA frá uppeldisfélagi sínu Völsungi árið 2009, hefur verið einn skæðasti sóknarmaðurinn í 1. deildinni undanfarin ár.

Síðustu þrjú sumur hefur hann skorað 22 mörk í 58 leikjum og var kosinn í lið ársins af þjálfurum og fyrirliðum deildarinnar 2012 og aftur í ár eftir að skora níu mörk í 21 leik.

Hallgrímur var samningslaus eftir tímabilið og æfði með KR fyrr í mánuðinum, en hann sagði fjögur félög berjast um sig í viðtali við fótbolti.net fyrr í vikunni.

Víkingar, sem höfnuðu í fjórða sæti Pepsi-deildarinnar í sumar og spila í Evrópukeppni í fyrsta sinn í 23 ár á næsta tímabili, ætla sér að styrkja liðið enn frekar, að sögn HeimisGunnlaugssonar, formanns meistaraflokksráðs.

Fossvogsliðið missti sinn besta mann, Aron Elís Þrándarson, í atvinnumennsku eftir tímabilið, en hann gerði þriggja ára samning við norska úrvalsdeildarliðið Álasund.