Kerra með níu ungmenni á miklum hraða á þjóðveginum

Traktor sem dró á eftir sér kerru með níu ungmennum í Skaftafellssýslu vakti óhug vegfarandi sem átti leið um þjóðveg eitt. Hafði hann samband við Vísi enda varð honum ekki um sel:

„Mér var bara gífurlega ofboðið. Þetta var ekkert annað en vítavert gáleysi enda var öllum unglingunum stefnt í hættu,“ segir vegfarandinn sem vildi ekki láta nafn síns getið.

Enginn öryggisbúnaður var á kerrunni, kerran var ekki á númerum og að öllum líkindum ólögleg. Ekki bættir úr skák að „gríðarleg umferð“ var í báðar áttir og traktorinn á töluverðri ferð.

Þegar myndinni var smellt af hafði traktorinn hægt á sér til að keyra yfir einbreiða brú á veginum.

„Maður hefur þurft að horfa upp á banaslys í kringum mann og því verður manni um og ó þegar maður sér aðra eins hegðun,“ bætir vegfarandinn við og fannst honum því rétt að vekja athygli á þessu.

Í samtali við lögreglumann í umdæminu sagði hann að þetta sé ekki eitthvað sem eigi að tíðkast, hvað þá á þjóðvegum landsins þar sem umferðarhraðinn er mikill og farþegum kerrunnar því stefnt í töluverða hættu að ósekju. Allir á vagninum eru án öryggis- og hlífðarbúnar og því má ekki mikið út af bregða svo að alvarlegt tjón verði. Fjölmörg dæmi eru um slíkt á síðustu árum.

Hann hvetur alla þá sem kunna að verða vitni að svipaðri hegðun í framtíðinni að hafa samband við lögregluna tafarlaust.