Söngleikur byggður á tónlist Tupacs sleginn af

Söngleikurinn, Holler If Ya Hear Me, sem byggður er á tónlist rapparans Tupacs Shakur verður sleginn af og hættir sýningum þann 20. júlí næskomandi. Söngleikurinn hefur verið í sýningu í Palace leikhúsinu á Broadway í aðeins tvo mánuði og hafa aðeins verið sýndar 55 sýningar.

Í tilkynningu frá pródúsent sýningarinnar, Eric L. Gold eru fjárhagsvandræði orsökin fyrir því að sýningum verði hætt fljótlega. Móðir Tupacs, Afeni Shakur var einnig pródúsent.

Léleg aðsókn hefur verið á sýningu að undanförnu, en í síðustu viku seldust aðeins miðar fyrir um rúmar sautján milljónir króna, en hefði verið uppselt á sýningar í síðustu viku, hefði innkoman verið rúmar 104 milljónir, sem er aðeins um sautján prósenta nýting.

Vinsælir söngleikir á Broadway eins og Lion King og Wicked er oft að hala inn um 114 til 220 milljónir króna á viku.

Söngleikurinn inniheldur yfir tuttugu lög rapparans en á meðal þeirra eru lögin, Holler If Ya Hear Me, California Love, I Get Around, Thugz Mansion, Keep Ya Head Up, Dear Mama, Me Against the World, Unconditional Love og Hail Mary.