Ronaldo: Fred og Jo eru ekki að spila vel

Ronaldo, fyrrverandi framherji brasilíska landsliðsins í fótbolta, hefur miklar áhyggjur af spilamennsku sinna manna en þeir verða að leggja sjóðheitt lið Kólumbíu í átta liða úrslitum í kvöld ætli þeir sér í undanúrslitin.

Brasilíska landsliðið hefur verið mikið gagnrýnt á mótinu, en það rétt slefaði inn í átta liða úrslitin eftir vítaspyrnukeppni gegn Síle. Kólumbíumenn eru aftur á móti í góðum gír; búnir að vinna alla fjóra leiki sína til þessa.

„Við erum enn að bíða eftir góðri frammistöðu hjá Brasilíu,“ segir Ronaldo. „Við erum ekki að spila vel og ég er svekktur með fyrstu fjóra leikina. Scolari verður að breyta einhverju.“

Ronaldo er einn besti framherji sögunnar og á markametið á HM ásamt MiroslavKlose en báðir skoruðu 15 mörk í lokakeppninni. Klose getur þó enn bætt metið.

Framherjar Brasilíu í ár eru ekki líklegir til sömu afreka en þeir Fred og Jo hafa aðeins skorað eitt mark samtals af þeim átta sem brasilíska landsliðið hefur skorað.

„Þeir eru ekki að spila vel - það er ekkert leyndarmál. Mitt ráð til þeirra er að hlaupa mikið. Það er ekkert auðvelt að spila sem nía þó svo þú sért með Neymar í liðinu,“ segir Ronaldo.

Aðspurður hver draumaúrslitaleikur hans sé segir markahrókurinn mikli: „Mig dreymir um úrslitaleik á milli Brasilíu og Argentínu.“