Van Persie veikur og gæti misst af leiknum

Robin van Persie missti af æfingu hollenska landsliðsins vegna magaverkja í dag. Óvíst er hvort hann geti spilað með liðinu gegn Argentínu í undanúrslitum HM á morgun.

Van Persie æfði einn síns liðs í dag og það gerði bakvörðurinn Daryl Janmaat einnig. Báðir fundu fyrir óþægindum í maga.

Louis van Gaal, landsliðsþjálfari Hollands, sagði á blaðamannafundi í dag að hann væri ekki viss um hvort van Persie yrði klár í slaginn á morgun.

„Það var best að hann tæki sér hvíld. Við vitum svo meira um ástand hans á morgun. Það er enn einn dagur til stefnu og Van Persie er afar mikilvægur leikmaður í okkar liði,“ sagði Van Gaal.