Þjálfari Nígeríu hefur áhyggjur af hitastiginu

Stephen Keshi, landsliðsþjálfari Nígeríu, vonast til þess að aðstæðurnar hafi ekki mikil áhrif á leik liðsins gegn Frakklandi í dag. Liðin mætast í höfuðborginni Brasilíu en búist er við háu hitastigi og miklum raka.

Nígería komst í fyrsta sinn frá því í Frakklandi árið 1998 í 16-liða úrslitin í ár en mæta þar frönsku liði sem spilaði gríðarlega vel saman í riðlakeppninni.

„Þeir eru með sterkt lið með hæfileikaríkum leikmönnum. Spilamennska þeirra hingað til kemur mér ekki á óvart, sérstaklega með góðan þjálfara eins og Didier Deschamps. Hann er baráttumaður sem kemur því hugarfari í leikmenn sína og manni líður eins og hann sé leikmaður í liðinu. Við þurfum svipaða spilamennsku og í seinni hálfleik gegn Argentínu til að eiga möguleika,“ sagði Keshi sem hefur áhyggjur af hitastiginu á meðan leik stendur.

„Hitastigið mun hafa áhrif á bæði lið. Þótt við séum frá Afríku og vanir miklum hita leika flestir leikmennirnir í liðinu mínu í Evrópu. Þetta er hitastig sem þeir þekkja ekki, í leiknum gegn Bosníu áttu leikmennirnir erfitt með að ljúka leiknum. Ég bað fyrir því að það yrði örlítið svalara inn á vellinum en í leiknum gegn Bosníu,“ sagði Keshi.