Mörkin þegar orðin fleiri en á HM fyrir fjórum árum

Frakkar unnu 2-0 sigur á Nígeríu í fyrri leik dagsins í sextán liða úrslitum HM í fótbolta og þessi úrslit þýða að mörkin á HM í Brasilíu en orðin fleiri en á HM fyrir fjórum árum.

Á HM í Suður-Afríku 2010 voru skoruð 145 mörk eða 2,27 mörk að meðaltali í leik. Fjórum árum fyrr voru mörkin 147 og á HM í Japan og Suður-Kóreu 2002 voru þau 161.  

Fyrra mark Frakka var mark númer 146 í keppninni í Brasilíu en það hafa verið skoruð 2,77 mörk að meðaltali í Brasilíu.

HM í Brasilíu er því þegar búin að ná HM í Suður-Afríku 2010 og HM í Þýskalandi 2006 í heildarmarkaskorun og það þótt að enn eigi eftir að leika ellefu leiki í keppninni.