Buffon: Ekkert Öskubuskulið

Gianluigi Buffon markvörður Ítalíu sagði eftir tapið gegn Kostaríka í heimsmeistarakeppninni í fótbolta í Brasilíu í gær að aldrei sé hægt að ganga að neinu vísu á stórmótum.

Þó Buffon viðurkenndi að úrslitin gegn Kostaríka hafi ekki farið eins og liðið bjóst við þá séu engin slök lið á HM.

„Við vonuðumst til að gera betur og höfðum undirbúið okkur undir að gera Kostaríka lífið leitt,“ sagði Buffon eftir tapið óvænta í gær.

„Í staðin lentum við í meiri vandræðum en við höfðum búist við og Kostaríka stjórnaði leiknum vel eftir að hafa komist yfir.

„Það kom þeim sem taka lífinu sem sjálfsögðum hlut og halda að það séu slök lið á HM á óvart að Kostaríka hafi komist áfram. Við höfum vitað í fjölda ára að það séu engin Öskubuskulið í keppninni,“ sagði Buffon.

Ítalía mætir Úrúgvæ í hreinum úrslitaleik um sæti í 16. liða úrslitum á þriðjudaginn.

„Við rífum okkur upp með því að líta á björtu hliðarnar. Jafntefli hefði engu breytt. Við hefðum hvort eð er þurft jafntefli gegn Úrúgvæ. Meira að segja sigur hefði þýtt að við þyrftum enn stig til að vera algjörlega öruggir.“