Agüero: Mark Messi frábært

Sergio Agüero framherji Argentínu á heimsmeistaramótinu í fótbolta í Brasilíu tók upp hanskann fyrir liðsfélaga sinn Lionel Messi og sagði markið hans gegn Bosníu hafa verið frábært.

Argentína lagði Bosníu 2-1 í fyrsta leik F-riðils í spennandi og jöfnum leik þar sem Argentína átti erfitt uppdráttar á löngum köflum.

Messi mistókst að skora á HM 2010 í Suður-Afríku bætti fyrir það með glæsilegu marki gegn Bosníu.

„Fólk talar of mikið um að það hafi verið átta ára munur á fyrsta og öðru HM marki hans,“ sagði Agüero í viðtali í aðdraganda leiks Argentínu við Íran sem hefst klukkan 16 í dag.

„Já, hann skoraði ekki á HM 2010 en spilaði mjög vel og lagði upp mörg mörk fyrir aðra. Það sem skiptir máli er að Argentína vinni og sem einstaklingur þá reynir enginn eins mikið og hann að ná fram sem bestum úrslitum fyrir liðið.

„Leo hefur verið frábær til þessa. Markið sem hann skoraði gegn Bosníu var eftir frábært skot. Við vorum líka ánægðir því við vitum hvað hann getur gert,“ sagði Agüero.