Evra minnti okkur á að njóta stundarinnar

Patrice Evra hefur reynt að leiðbeina ungum stjörnum franska landsliðsins samkvæmt Raphael Varane.

Þrátt fyrir að litlar væntingar hafi verið gerðar til liðsins hefur franska landsliðið farið vel af stað á mótinu. Liðið fylgdi eftir 3-0 sigri á Hondúras með 5-2 sigri á Sviss og er sæti þeirra í 16-liða úrslitum öruggt.

Frægt var á Heimsmeistaramótinu 2010 þegar franska liðið komst ekki upp úr riðlinum. Mikil óeind var innan leikmannahópsins á mótinu og voru Evra, Nicolas Anelka og Samir Nasri málaðir sem sökudólgar af Raymond Domenech, þáverandi landsliðsþjálfara Frakklands.

Evra er sá eini úr þeim hóp sem valinn var fyrir Heimsmeistaramótið í ár af Didier Deschamps, þjálfara franska landsliðsins.

„Hann er mjög mikilvægur fyrir liðið. Hann notar reynsluna sína til þess að reyna að leiðbeina okkur ungu leikmönnunum sem við þurfum á að halda. Hann minnti okkur á að njóta stundarinnar og skapa minningar frekar en að láta taugarnar ná til okkar,“ sagði Varane.