Hodgson gerir níu breytingar á enska liðinu

Roy Hodgson gerir níu breytingar á byrjunarliði enska landsliðsins sem mætir Kostaríka á morgun í þýðingarlausum leik á HM í Brasilíu.

Gary Cahill og DanielSturridge eru þeir einu sem halda sæti sínu frá leiknum gegn Úrúgvæ en inn koma menn á borð við Ben Foster, ChrisSmalling, LukeShaw og JackWilshere.

„Ég vil að sem flestir taki þátt í allavega einum leik áður en þeir fara heim af mótinu. Við vitum alveg hversu svekktir stuðningsmennirnir eru, en þeir standa samt með okkur,“ sagði Roy Hodgson á blaðamannafundi í dag.

„Þegar maður klikkar svona á heimsmeistaramóti getur síðasti leikurinn verið sá sem sendir þig inn í framtíðina. Þetta er tækifæri fyrir okkur að sýna að við erum samkeppnishæfir með þetta lið.“

Byrjunarliðið: Ben Foster; Phil Jones, Gary Cahill, Chris Smalling, Luke Shaw; James Milner, Frank Lampard, Jack Wilshere; Ross Barkley, Adam Lallana, Daniel Sturridge.