Erum á réttri leið

Neymar finnur hvernig meðbyrinn eykst með brasilíska liðinu með hverjum leik sem það spilar. Neymar var á skotskónnum í gærkvöldi í 4-1 sigri Brasilíumanna á Kamerún.

„Sem lið áttum við okkar besta leik og það er það sem skiptir máli. Við sóttum sem lið og allir leikmenn liðsins eiga hrós skilið fyrir leikinn. Við erum á réttri leið sem lið og höldum vonandi áfram að bæta leik okkar.“

Sigurinn tryggir sæti Brasilíu í 16-liða úrslitum Heimsmeistaramótsins sem haldið er í Brasilíu. Í 16-liða úrslitum mæta þeir Síle sem hefur komið á óvart í upphafi móts. Sagan er hinsvegar með heimamönnum en þeir hafa ekki tapað keppnisleik í Brasilíu frá árinu 1975.

„Ég fæ að upplifa barnæskudrauminn minn á þessu móti. Mig dreymdi um að spila á Heimsmeistaramóti fyrir Brasilíu og ég fæ að gera það þessa dagana. Ég mun gera hvað sem er til að gera leikmenn liðsins betri og reyna að vinna leikina sem framundan eru,“ sagði Neymar.