Reynum að vinna leikinn

Spilamennska bandaríska landsliðsins hefur komið Mats Hummels, leikmanni þýska landsliðsins og Dortmund, á óvart. Þýskaland mætir Bandaríkjunum í lokaleik G-riðilsins þar sem jafntefli dugar báðum liðum til þess að tryggja sæti sitt í 16-liða úrslitum.

Þrátt fyrir að vera í riðli sem talinn var einn af dauðariðlunum hafa Bandaríkjamenn komið mörgum á óvart með spilamennsku sinni. Jafntefli gegn Portúgal fylgdi sigri á Gana í fyrsta leik og eru Bandaríkjamenn í dauðafæri á því að komast í 16-liða úrslitin.

„Spilamennskan þeirra hefur komið mér á óvart. Þrátt fyrir að það séu góðir leikmenn í hópnum átti ég ekki von á því að liðið myndi ná jafn góðum árangri. Þetta verður erfiður leikur eins og æfingarleikurinn í fyrra sýndi,“ en Bandaríkin lögðu Þýskaland af velli fyrir ári síðan 4-3 í æfingarleik.

Hummels á ekki von á því að liðin muni sætta sig við jafntefli.

„Það væri ekki rétt að reyna ekki að vinna leikinn, við spilum ekki þannig fótbolta. Ég mun hinsvegar ekki taka neina sénsa í uppbótartíma og reyna að leika á fjóra leikmenn andstæðingsins. Kannski tvo,“ sagði Hummels léttur.