Hodgson þarf sex ár

Roy Hodgson telur að hann þurfi sex ár til þess að ná fram því besta úr enska landsliðshópnum.

Mótið í Brasilíu var enn eitt vonbrigðamótið fyrir Englendinga sem hafa aðeins einu sinni komist lengra en átta liða úrslit frá því að þeir unnu mótið á heimavelli árið 1966. Árangurinn í ár var hinsvegar sögulegar slakur en Englendingar komust ekki upp úr riðlakeppninni í fyrsta sinn frá árinu 1958.

Hodgson hefur hinsvegar fulla trú á því að hann sé rétti maðurinn til að leiða endurnýjun í enska hópnum. Vanmat hann að eigin mati hversu erfitt mótið yrði og hversu sterkir mótherjarnir yrðu.

„Ég geri mér nú grein fyrir því að það má engin mistök gera á slíku móti. Við undirbjuggum okkur vel en náðum ekki markmiðum okkar sem er gríðarlega svekkjandi. Nú tekur við leikur gegn Kosta Ríka þar sem leikmenn geta sýnt mér hvað í þeim býr fyrir næstkomandi leiki,“ sagði Hodgson sem bað um meiri tíma.

„Vonandi getum við skilað einhverjum árangri á næstu sex árum. Við erum að reyna að byggja upp lið til framtíðarinnar. Eftir sex ár eru leikmennirnir sem eru að fá tækifæri núna á hápunkti ferilsins og vonandi skilar það einhverju fyrir liðið,“ sagði Hodgson.