Verða Aron og félagar fyrstir til að vinna eftir Amasón-ferð?

Aron Jóhannsson og félagar hans í bandaríska landsliðinu mæta Þýskalandi á morgun í lokaumferð H-riðils á HM í fótbolta í Brasilíu en þar þarf bandaríska liðið að koma til baka eftir erfitt ferðlag.

Bandaríska liðið var aðeins nokkrum sekúndum frá því að tryggja sér sæti í sextán liða úrslitum í síðasta leik liðsins á móti Portúgal og þarf enn eitt stig til að tryggja sig áfram í útsláttarkeppnina.

Bandaríkin gerði 2-2 jafntefli við Portúgal í síðasta leik þar sem að Portúgalar jöfnuðu leikinn seint í uppbótartíma. Leikurinn fór fram á Arena da Amazónia í Manaus en hingað til hafa Amasón-aðstæðurnar tekið sinn toll á HM í Brasilíu.

Öll fjögur liðin sem hafa spilað leik á Arena da Amazónia í Manaus hafa tapað næsta leik sínum á eftir en bæði langt ferðalag sem og hitinn og rakinn í Manaus reynast liðunum erfið í næsta leik.

Liðin fjögur sem hafa tapað eftir heimsóknina norður í Amasón eru lið Englands, Ítalíu, Króatíu og Kamerún. Ítalir hafa meira að segja tapað tveimur leikjum í röð og ekki skorað eitt einasta mark eftir leikinn sinn þar.



Liðin sem hafa spilað í Manaus á HM í Brasilíu 2014:

Ítalía (2-1 sigur á Englandi 14. júní)

Næsti leikur: 0-1 tap fyrir Kosta Ríka 20. júní

England (1-2 tap fyrir Ítalíu 14. júní)

Næsti leikur: 1-2 tap fyrir Úrúgvæ 19. júní

Króatía (4-0 sigur á Kamerún 18. júní)

Næsti leikur: 1-3 tap fyrir Mexíkó 23. júní

Kamerún (0-4 tap fyrir Króatíu 18. júní)

Næsti leikur: 1-4 tap fyrir Brasilíu 23. júní