Valencia sá rautt er Ekvador féll úr keppni

Frakkland og Ekvador skildu jöfn, markalaus, í lokaumferð E-riðils á HM 2014 í fótbolta í kvöld en Frakkar unnu riðilinn.

Ekvador þurfti að vinna leikinn og vonast til þess að Sviss myndi ekki vinna Hondúras með meira en tveimur mörkum. Sviss afgreiddi Hondúras, 3-0, og tryggði sig áfram en Ekvador er úr leik.

Antonio Valencia, kantmaður Manchester United, hjálpaði félögum sínum í Ekvador ekkert í leiknum en hann fékk rautt spjald fyrir ruddalega tæklingu á 50. mínútu leiksins.

Ekvador er eina liðið frá Suður-Ameríku sem tókst ekki að komast í 16 liða úrslitin en þangað komust Brasilía, Úrúgvæ, Argentína, Kólumbía og Síle.

Frakkar mæta Nígeríu í 16 liða úrslitunum en leikurinn fer fram 30. júní í Brasilíuborg.