Mistök Akinfeev felldu Rússa

Alsír komst í kvöld í 16 liða úrslit HM í Brasilíu með því að gera jafntefli við Rússland, 1-1, í lokaumferð H-riðils, en með leiknum lauk riðlakeppninni á HM 2014.

Alsír vissi fyrir leikinn að jafntefli myndi líklega alltaf duga liðinu, en það lenti samt sem áður undir strax á sjöttu mínútu þegar AleksandrKokorin skoraði glæsilegt skallamark fyrir Rússa, 1-0.

Igor Akinfeev, markvörður Rússlands, gerðist sekur um glæpsamleg mistök í fyrsta leiknum gegn Suður-Kóreu sem kostaði liðið tvö stig og það sama var uppi á teningnum í kvöld.

CSKA Mosvku-markvörðurinn ætlaði að kýla fyrirgjöf frá vinstri frá markinu á 60. mínútu en hitti ekki boltann. Islam Slimani stóð tilbúinn fyrir aftan markvörðinn og skallaði knöttinn í netið, 1-1.

Rússar sóttu stíft undir lok leiks en tókst ekki að bæta við marki. Þeir eru því úr leik en Alsír er komið áfram í 16 liða úrslitin í fyrsta skipti í sögu HM.

Belgar vinna riðilinn með níu stig, Alsír fékk fjögur stig, Rússland tvö stig og Suður-Kórea eitt stig.

Alsír mætir Þýskalandi í 16 liða úrslitunum. Leikurinn fer fram í Porto Alegre þann 30. júní.