Podolski ekki með gegn Alsír

Lukas Podolski, framherji Þýskalands, verður ekki með Þýskalandi í leiknum gegn Alsír á mánudag. Podolski glímir við meiðsli í læri.

Þessi 29 ára gamli leikmaður Arsenal meiddist í 1-0 sigri Þýskalands á Bandaríkjunum í síðasta leik Þjóðverja í riðlinum. Hann fór af velli í hálfleik.

„Lukas verður að hvíla í tvo til þrjá daga," sagði Joachim Löw, þjálfari Þýskalands.

„Ef við förum áfram, þá verður það ekki vandamál fyrir hann að spila."

Hægri bakvörðurinn, Jerome Boateng, missti af æfingu í gær vegna hnémeiðsla en reiknað er með að hann spili á morgun.