Grikkirnir vilja enga bónusa

Gríska landsliðið í knattspyrnu virðist bera hag knattspyrnunnar fyrir brjósti í heimalandinu.

Leikmenn liðsins skrifuðu bréf til yfirvalda í landinu þar sem þeir koma fram með skýr skilaboð að þeir vilji ekki neina bónusa né peningaupphæð. Þeir vilja íþróttamiðstöð.

Allir 23 leikmenn liðsins skrifuðu undir bréfið sem Antonis Samaras, forsætisráðherra Grikklands, fékk í hendurnar.

„Okkur langar ekki í auka bónus eða peninga. Við spilum einungis fyrir Grikkland og fólkið. Allt sem við viljum frá ykkur til að styðja við okkur er að finna landsvæði og búa til íþróttamiðstöð sem hýsir landslið okkar," segir í bréfinu.

Grikkland er komið í 16-liða úrslitin og mætir í kvöld Kosta Ríka klukkan 20:00, en leikurinn fer fram á Pernambuco leikvangnum í Brasilíu.