Cabaye varar Frakkland við hroka

Yohan Cabaye, miðvallarleikmaður Frakklands, segir að liðsfélagar hans megi ekki fara fram úr sér um vonir og væntingar á heimsmeistaramótinu sem nú stendur yfir.

Bacary Sagna, liðsfélagi Cabaye í franska landsliðinu, sagði í viðtali á dögunum að það væri klúður ef Frakkland myndi ekki vinna HM.

„Það er gott að vera metnaðarfullur, en að segja að við séum að fara vinna HM er of mikið. Sjálfstraust á ekki að verða að hroka," sagði þessi 28 ára leikmaður PSG.

Frakkland mætir Nígeríu á morgun, en þetta er í fyrsta skipti síðan 1998 sem Nígería nær að komast í 16-liða úrslitin.

„Eitt feilspor og þú ert farinn heim, þannig þú ert með mikla pressu á þér. Ég ber virðingu fyrir liði Nígeríu, en við getum farið áfram. Þú verður að vera varkár þegar þú segir að við séum að fara vinna HM."

„Þú ert að setja á þig ástæðulausa pressu," sagði Cabaye við fjölmðla.