Þurfum að vinna baráttuna á miðjunni

Luka Modric, miðjumaður Króatíu telur að Króatar þurfi að eiga fullkominn leik til þess að ná einhverju úr leiknum gegn Brasilíumönnum í kvöld.

Króatar mæta Brasilíumönnum í opnunarleik mótsins klukkan 19.55 í kvöld. Mikil pressa er á heimamönnunum á heimavelli en brasilíska liðið er talið eitt af sigurstranlegri liðunum á mótinu.

Modric telur að Króatía sem sló út Ísland í umspili upp á sæti á HM gæti fengið eitthvað út úr leiknum í kvöld. Til þess þurfa Króatar hinsvegar að eiga fullkominn leik.

„Það er langt síðan Króatía spilaði jafn stóran leik. Brasilíska liðið mun koma inn í leikinn með sjálfstraustið í botni og við þurfum að spila sem ein heild í leiknum til að eiga einhverja möguleika,“ sagði Modric en hann hrósaði leikmönnum Brasilíu.

„Þetta er frábært lið með þrjá heimklassaleikmenn í Thiago Silva, Marcelo og Neymar. Við þurfum að hafa betur á miðjunni í leiknum og vera tilbúnir að verjast þegar við töpum boltanum.“

Modric útilokaði ekki að Króatar gætu komist langt í mótinu en auk Brasilíu eru Kamerún og Mexíkó í A-riðlinum.

„Ef við komumst upp úr riðlinum þá gætum við farið langt. Leikmenn liðsins hafa tekið miklum einstaklingsframförum frá Evrópumótinu 2012 en spurningin er hvort við höfum bætt okkur sem lið,“ sagði Modric.