Lukkan í liði með gestgjöfunum

Brasilía komst á beinu brautina á HM í knattspyrnu eftir erfiða byrjun í opnunarleiknum í Sao Paulo í kvöld.

Marcelo varð fyrir því óláni að skora sjálfsmark í upphafi leiks og sló þá þögn á heimamenn á leikvanginum.

Brasilíumenn tóku yfir leikinn stuttu síðar sem skilaði sér í marki Neymar um miðbik hálfleiksins. Skot hans rétt utan vítateigs fór í stöngina og inn. Rétt áður fékk hann áminningu fyrir olnbogaskot á Luka Modric og slapp með skrekkinn.

Staðan í hálfleik var 1-1 en eftir rólega byrjun í síðari hálfleik fengu heimamenn umdeilda vítaspyrnu en Dejan Lovren var þá dæmdur brotlegur fyrir að toga niður sóknarmanninn Fred, sem lét sig falla við litla snertingu.

Króatíumenn sóttu nokkuð stíft undir lokin og gáfu þar með færi á sér. Það nýttu Brasilíumenn sér í nyt og Oscar skoraði eftir skyndisókn í uppbótartíma. Heimamenn fögnuðu gríðarlega enda þrjú mikilvæg stig í húsi.