Réttlætinu fullnægt og Mexíkó vann

Mexíkó náði að kreista fram 1-0 sigur gegn Kamerún í A-riðli á HM í knattspyrnu þrátt fyrir að tvö lögleg mörk voru dæmd af liðinu.

Giovani Dos Santos skoraði mörkin umdeildu í fyrri hálfleik en í bæði skiptin var hann dæmdur rangstæður. Endursýningar í sjónvarpi sýndu þó að ákvörðun aðstoðardómara var röng í báðum atvikum.

Oribe Peralta skoraði svo sigurmark Mexíkó í síðari hálfleik þegar hann fylgdi eftir skoti Dos Santos sem Charles Itandje varði í marki Kamerún.

Afríska liðið sótti minna í leiknum en Samuel Eto'o átti þó skot í stöng og Benoit Assou-Ekotto átti skot úr aukaspyrnu sem fór framhjá.

Brasilía og Mexíkó eru því með þrjú stig að lokinni fyrstu umferð A-riðils en Króatía og Kamerún eru enn án stiga.

Hér fyrir neðan má sjá svipmyndir úr leiknum í kvöld.