Suarez missir af fyrsta leiknum

Landsliðsþjálfari Úrúgvæ hefur staðfest að Luis Suarez verði ekki í byrjunarliðinu gegn Kosta Ríka á morgun.

Þetta er fyrsti leikur liðanna í D-riðli en Suarez hefur verið í kapphlaupi í tímann eftir að hann gekkst undir aðgerð á hné þann 21. maí. Suarez er þó byrjaður að æfa á nýjan leik og er ekki útilokað að hann komi við sögu í leiknum sem varamaður.

Oscar Tabarez, landsliðsþjálfari, tilkynnti í kvöld byrjunarlið sitt og mun Diego Forlan vera ásamt Edinson Cavani í framlínu Úrúgvæ.

Suarez skoraði 31 deildarmark með Liverpool í Englandi í vetur og var valinn besti leikmaður deildarinnar.