Fyrrum þjálfari Arons gestur HM-messunnar í kvöld

Ásmundur Arnarsson, þjálfari Fylkis, verður gestur Gumma Ben í HM-Messunni sem hefst á Stöð 2 Sport 2 klukkan 21.10.

Ásmundur gaf Aroni Jóhannssyni eldskírn sína í meistaraflokki hjá Fjölni fyrir rúmum fimm árum síðan. Í kvöld mæta Bandaríkjamenn liði Gana í fyrsta leik sínum í riðlakeppni heimsmeistaramótsins sem fram fer í Brasilíu.

Aron gæti orðið fyrsti Íslendingurinn til að leika á HM en Aron ákvað í júlímánuði á síðasta ári að leika með bandaríska landsliðinu í stað þess íslenska. Auk þess að hita upp fyrir leik Bandaríkjanna gegn Gana verður einnig ítarlega farið yfir leik Þýskalands og Portúgals og leikurinn greindur eins og Messunni einni er lagið.

Klukkan 22.00 hefst leikurinn svo í beinni útsendingu á Stöð 2 Sport 2. Leikurinn er í háskerpu eins og allar beinar útsendingar Stöðvar 2 Sports 2 frá heimsmeistaramótinu í Brasilíu.