Brassarnir skutu púðurskotum

Gestgjafar Brasilíu skemmtu heimsbyggðinni ekki í kvöld gegn Mexíkó með arfaslökum leik gegn Mexíkó sem endaði með markalausu jafntefli.

Fyrri hálfleikur var vægt til orða tekið tilþrifalítill. Það helsta sem vakti athygli var hárið á Neymar og Dani Alves en það var að mestu orðið hvítt.

Neymar átti reyndar laglegan skalla í hálfleiknum sem var varinn með tilþrifum. Það var eina markverða atvik fyrri hálfleiks.

Sambabolti Brasilíumanna var víðsfjarri og liðinu gekk ekkert að brjóta niður vörn Mexíkóa.

Neymar komst í fínt skotfæri um miðjan síðari hálfleik en aftur varði Ochoa vel frá honum en hann var í miklu stuði í leiknum.

Langbesta færi leiksins kom fimm mínútum fyrir leikslok. Þá fékk Thiago Silva frían skalla inn í markteig. Skallinn var algjörlega misheppnaður og beint á Ochoa. Engu líkara en hann væri með segul í hönskunum. Það fór allt í hann.

Mexíkó átti tvær góðar sóknartilraunir í lokin en hafði ekki erindi sem erfiði.