Aron og félagar keppa um milljónagreiðslur

Aron Jóhannsson og 29 aðrir leikmenn bandaríska landsliðsins keppa nú um sæti í HM-hópi Bandaríkjanna og er að miklu að keppa. 23 leikmenn verða í lokahópnum.

Eðlilega er það heiðurinn að fá að taka þátt í HM sem skiptir mestu máli en það er eflaust ekki verra að fá ágætlega borgað fyrir það líka.

Þeir sem komast í HM-hóp bandaríska liðsins fá allir að lágmarki 8,6 milljónir króna frá bandaríska knattspyrnusambandinu. Ekki beint mestu launin á HM en það munar víst um hverja krónu.

Það eru ekki allir leikmenn landsliðsins á sömu launum og Clint Dempsey sem fær 760 milljónir króna á ári hjá Seattle.

Hinn tvítugi DeAndre Yedlin er til að mynda með rúmar 10 milljónir króna í árslaun og hann myndi því næstum tvöfalda árslaun sín ef hann kæmist í hópinn.