Innlent

Frambjóðandi sér eftir því að hafa sagt Rússnesku rétttrúnaðarkirkjunni að „fokka sér“

Kjartan Atli Kjartansson skrifar
Kristín Soffía Jónsdóttir er á fjórða sæti lista Samfylkingarinnar.
Kristín Soffía Jónsdóttir er á fjórða sæti lista Samfylkingarinnar.

„Ég get sagt þér að fyrir tveimur árum sá ég þessa auglýsingu og upplifði hana sem árás á mig á mína fjölskyldu,“ segir Kristín Soffía Jónsdóttir, frambjóðandi Samfylkingarinnar í borgarstjórnarkosningum, um ummæli sem hún lét falla á Facebook fyrir tæpum tveimur árum um auglýsingu í Fréttablaðinu á vegum Rússnesku rétttrúnaðarkirkjunnar.

Kristín Soffía skrifaði þá færslu á Facebook, við frétt DV, að rússneska Réttatrúnaðarkirkjan mætti „fokka sér“ og að það væri „ömurlegt“ að Reykjavík væri búin að „útdeila lóð til þessa skítasafnaðar“.

Kristín Soffía er nú varaborgarfulltrúi Samfylkingarinnar og er í fjórða sæti á lista flokksins í borgarstjórnarkosningunum.

Hér má sjá hvað Kristín Soffía sagði á Facebook.

Birtist sama dag og Gay Pride
Auglýsingin birtist sama dag og Gleðiganga samkynhneigðra fór fram í Reykjavík og hljóðaði svo: 

„Ef kristið fólk þegir þá talar Biblían.... Villist ekki! Hvorki munu saurlífismenn né skurðgoðadyrkendu, hórkarlar né kynvillingar, þjófar né ásælni, drykkjumenn, lastmálir né ræningar Guðs ríki erfa. (Fyrra bréf Páls til Korin 6:9-10)“.

Ekkert nafn var undir auglýsingunni og baðst Fréttablaðið afsökunar á því á sínum tíma.

Kristín Soffía segir tímasetninguna á birtingu auglýsingarinnar hafa haft áhrif á viðbrögð sín. Hún segist samt sjá eftir ummælunum. „Auðvitað er orðalagið ekki gott,“ segir Kristín, um það sem hún skrifaði á Facebook. 

Um lóðarúthlutnina til safnaðarins segir Kristín Soffía: 

„Úthlutunin var samkvæmt lögum. Ég tel að Reykjavíkurborg eigi að fara að lögum og samkvæmt lögum er borginni skylt að veita söfnuðum ókeypis lóðir undir bænahús, kirkjur eða aðrar sambærilegar byggingar,“ segir Kristín og heldur áfram:

„Að sama skapi á hatursfull umræða aldrei rétt á sér. Þau lög verður að virða líka.“

Hlynnt trúfrelsi
Hún segist sjá eftir ummælunum: „Já, ég sé eftir þessum ummælum og það er gott að fá tækifæri til að biðjast afsökunar á þeim. Andúð mín til þessarar auglýsingarinnar er óbreytt engu að síður.“
Kristín segist vera hlynnt trúfrelsi. „Já, ég er hlynnt trúfrelsi, kynfrelsi og baráttu hinsegin fólks um allan heim. Það er mikilvægt að virða mannréttindi fólks.“

Hún segir að trú og trúfélög eigi ekki að skjóta skálkaskjóli yfir þá sem stunda hatursfulla umræðu.

Vekja athygli í ljósi umræðunnar
Ummæli Kristínar Soffíu hafa vakið athygli og verið í umferð á samfélagsmiðlum, sér í lagi vegna umræðunnar um ummæli Sveinbjargar Birnu Sveinbjörnsdóttur, oddvita Framsóknar og flugvallarvina, um afturköllun lóðar til Félags múslima, á föstudaginn.

Ummæli Sveinbjargar hafa verið mikið rædd undanfarna daga og voru meðal annars fordæmd af Degi B. Eggertssyni, oddvita Samfylkingarinnar. 


Tengdar fréttir

Oddviti Framsóknar vill afturkalla lóð til múslima

"Ég hef búið í um eitt ár í Sádí Arabíu og byggi þessa skoðun mína ekki á fordómum, heldur reynslu," segir Sveinbjörg Birna Sveinbjörnsdóttir, oddviti lista Framsóknarflokksins og flugvallarvina. Hún telur að á meðan hér á landi sé þjóðkirkja eigi ekki að úthluta lóðar til byggingu mosku eða sambærilegra húsa annarra trúfélaga.

Umdeild auglýsing

Auglýsing, sem birtist í Fréttablaðinu á laugardaginn, hneykslaði marga lesendur, og það skiljanlega. Þar birtist tilvitnun í fyrra Kórintubréf Páls postula, þar sem "kynvillingar“ eru taldir upp í langri runu siðleysingja og glæpamanna, sem muni ekki erfa Guðs ríki.

Rétttrúnaðarkirkjan keypti auglýsinguna

Í Fréttablaðinu á laugardag birtist auglýsing undir yfirskriftinni "Ef kristið fólk þegir þá talar Biblían“ Þar var birt tilvitnun í fyrra Korintubréf Biblíunnar. Þau mistök voru gerð við birtingu auglýsingarinnar að krefjast þess ekki að auglýsandinn nafngreindi sig. Kaupandi auglýsingarinnar er Söfnuður Moskvu-Patríarkatsins á Íslandi, öðru nafni Rússneska rétttrúnaðarkirkjan. Beðist er afsökunar á mistökunum. - bj



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.