Van Persie skoraði í jafntefli Hollands og Ekvadors

Robin van Persie skoraði mark Hollands þegar liðið gerði 1-1 jafntefli við Ekvador í vináttulandsleik sem fór fram á AmsterdamArena, heimavelli Ajax.

Jefferson Antonio Montero kom Ekvador yfir eftir níu mínútna leik, en van Persie jafnaði metin á 37. mínútu og þar við sat.

Leikurinn var liður í undirbúningi liðanna fyrir HM í Brasilíu sem hefst eftir tæpan mánuð.

Holland leikur í B-riðli í sumar, ásamt heimsmeisturum Spánar, Chile og Ástralíu. Ekvador dróst í E-riðil með Sviss, Frakklandi og Hondúras.