Mótmæli við Innanríkisráðuneytið

Boðað hefur verið til mótmæla til stuðnings Ghasem Mohammadi, tvítugum Afgana, sem á yfir höfði sér brottvísun frá Íslandi. Mótmælin verða fyrir utan Innanríkisráðuneytið, að Sölvhólsgötu 7, klukkan 11 í dag.

Ghasem er í dag á áttunda degi hungurverkfalls og var hann í gær fluttur meðvitundarlaus á sjúkrahús þar sem hann fékk blóðvökva.

Ghasem flúði frá Afganistan sextán ára gamall. Hann kom til Íslands árið 2012 og sótti um pólitískt hæli. Umsókn hans var hafnað, en Ghasem hafði áður sótt um hæli í Svíþjóð.

Hann segist vera orðinn örvæntingafullur og þreyttur á biðinni og segist frekar vilja deyja hér á landi heldur en að fara aftur til Afganistans.

Hann ætlar sér að halda hungurverkfallinu áfram þar til Útlendingastofnun eða Innanríkisráðuneytið tekur umsókn hans til efnislegrar umfjöllunar.