Innlent

Þrjátíu þúsund kallinn fær nýtt heimili: „Alltaf haft nóg á milli handanna“

Kolbeinn Tumi Daðason skrifar
Jóni Þór var vel tekið í húsakynnum Mæðrastyrksnefndar í dag.
Jóni Þór var vel tekið í húsakynnum Mæðrastyrksnefndar í dag. Vísir/Daníel
„Það kom gagnrýni á Facebook um það að þingmenn hafi greinilega nóg á milli handanna fyrst þeir eru að rífa peningaseðla. Það er reyndar alveg rétt,“ segir Jón Þór Ólafsson, þingmaður pírata.

Jón Þór vakti athygli á þingfundi í dag þegar hann reif þrjá tíu þúsund krónu seðla. Vildi hann með því gagnrýna hvernig staðið væri að umræðum á þinginu vegna skýrslu Rannsóknarnefndar Alþingis um fall sparisjóðina.

Kostnaður við skýrsluna væri um 600 milljónir króna og væri þeim kostnaði skipt yfir fimm klukkustundir sem væru áætlaðar til umræðu um skýrsluna á þinginu í dag svaraði kostnaðurinn til um 30 þúsund króna á sekúndu.

Mynd/Jón Þór
Gerði Jón Þór tilraun til þess að rífa seðlana þrjá á sekúndu eins og Vísir fjallaði um fyrr í dag. Mat Jón sem svo að það hefði honum ekki tekist. Uppákoman hefur vakið töluverða athygli, sumir lofað hana en aðrir gagnrýnt. Veltu sumir fyrir sér hvort löglegt væri að rífa peningaseðla. Stefán Jóhann Stefánsson, ritstjóri Seðlabankans, staðfesti við Vísi að það bryti engin lög. Engu að síður hvatti Stefán Jóhann alla til að fara vel með peningana sína.

Jón Þór hefur ákveðið að láta peningana renna til Mæðrastyrksnefndar. Hann gerði sér ferð í bankann þar sem hann gat skipt rifnu seðlunum út fyrir heila.

„Við þingmenn höfum nóg á milli handanna. Mér fannst bara ágætt að láta þessa seðla fara til þeirra sem þurfa mest á þeim að halda,“ segir hann og minnir á laun þingmanna.

„Við fáum 630 þúsund krónur á mánuði plús 85 þúsund krónur ofan á það í starfskostnað sem rennur inn í launin ef við notum hann ekki. Þannig að við þingmenn höfum nóg,“ segir Jón.

„Ég hef nóg og hef alltaf haft nóg. Ég hef aldrei þurft mikla peninga og þess vegna hef ég haft nóg.“

„Kærar þakkir. Þetta kemur sér vel því framundan eru páskar og þörfin er fyrir hendi,“ segir í tilkynningu frá Mæðrastyrksnefnd.Vísir/Daníel
Jón Þór segist afar ósáttur með þann skamma tíma sem ætlaður var í umræðu um skýrsluna í dag. Þingið eigi að hafa eftirlit með stjórnvöldum sem sé erfitt þegar þingforseti setji skýrsluna fyrst undir stól og svo eigi að ræða skýrsluna innan við sólarhring eftir birtingu hennar.

„Það væri ágætt að við myndum þrýsta á þennan þingforseta að laga þessi vinnubrögð á þingi svo við förum að vinna fyrir laununum okkar,“ segir Jón Þór. Þingmenn minnihlutans hafi vegna þessa lagt fram lagafrumvörp sem eigi að leysa þessi vandamál.

Jón Þór fékk stutta kynningu á starfsemi Mæðrastyrksnefndar.Vísir/Daníel
„Þar segir að ekki skuli taka lokaskýrslu rannsóknarnefndar til umræðu í þinginu fyrr en í fyrsta lagi þremur nóttum eftir birtingu hennar. Sem þýðir að fyrstu tvo dagana geti verið umræða í samfélaginu og einstaka þingmenn kannski tjáð sig en helst skýrsluhöfundar, sérfræðingar í innihaldi skýrslunnar. Svo á þriðja degi myndu stjórnmálamenn koma með sína pólitík að þessu.“

En hvað veldur því að þingið taki skýrsluna til umfjöllunar á þennan hátt? Fjalli um málið svo fljótt eftir útgáfuna að erfitt er að mynda sér skoðun á því?

„Þetta er rannsóknarskýrsla um afglöp yfirvalda sem þýðir auðvitað margir þingmenn sem eru enn á þingi og þeirra flokksstarfsmenn og tengda aðila. Þannig að þetta er að sjálfsögðu óþægilegt fyrir marga vel tengda aðila í þessu samfélagi.“


Tengdar fréttir

Skýrslan um fall sparisjóðanna í heild sinni

Farið verður yfir helstu niðurstöður rannsóknarinnar, þar á meðal starfs- og lagaumhverfi sparisjóðanna, fjárfestingar, útlán, stofnfjáraugningar, arðgreiðslur og fjárhagslega endurskipulagningu þeirra.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.