Vilja að heimilisofbeldisbrot falli undir almenn hegningarlög

Heimilisofbeldisbrot eiga að falla undir almenn hegningarlög þar sem þolandinn þarf ekki að leggja fram kæru. Þetta er mat lögreglunnar á Suðurnesjum sem hefur unnið markvisst í málaflokknum á síðastliðnu ári og náð eftirtektarverðum árangri. Öll úrræði eru nýtt og gerendur fjarlægðir af heimili sínu.

Samkvæmt nýlegum rannsóknum þá er hlutfall heimilisofbeldis á Suðurnesjum með því hæsta sem gerist á landinu. Lögreglan á Suðurnesjum hefur ráðist í markvisst átak til að stemma stigu við heimilisofbeldi.

„Við sáum það að þessi málaflokkur, heimilisofbeldi, var ekki tekinn nógu föstum tökum. Við vorum ekki að vinna þetta nógu vel. Við sáum það líka að við í lögreglunni að þegar við förum í þessi mál að við ráðum ekki við þetta ein,“ segir Skúli Jónsson, aðstoðaryfirlögregluþjónn hjá lögreglunni á Suðurnesjum.

Strax leitað til félagsþjónustu

Yfirskrift verkefnisins er að Halda glugganum opnum. Þegar lögreglan á Suðurnesjum kemur inn á heimili þar sem heimilisofbeldi á sér stað er strax kallað á félagsþjónustu. Í stað þess að bíða þá eru öll úrræði nýtt strax og hefur það gefið góða raun. „Við gerum þetta ekki síðar heldur núna,“ bætir Skúli við.

Átak lögreglunnar á Suðurnesjum hefur vakið athygli og íhuga önnur lögregluembætti að taka upp sams konar starfshætti. Skúli segir að lögregluembættið hafi rekist á marga veggi og telur þörf á lagabreytingum.

„Það er okkar mat að breyta þurfi almennum hegningarlögum. Við þurfum að koma heimilisofbeldisbrotum inn í hengningarlög og þau séu þar með sjálfstætt brot. Þolandinn á ekki þurfa að leggja fram kæru - það er samfélagið sem gerir það,“ segir Skúli.

Gerendur fjarlægðir af heimili

Lögreglan á Suðurnesjum nýtir lagarammann vel. Gerendur í heimilisofbeldismálum eru fjarlægðir af heimilum sínum og fá jafnvel ekki að snúa aftur fyrr en mánuði síðar.

„Þetta er að skila árangri,“ segir Alda Hrönn Jóhannsdóttir, yfirmaður lögfræðisviðs lögregluembættisins á Suðurnesjum. „Við erum að grípa inn í mál og vonandi að koma í veg fyrir ítrekanir. Þessu fylgir gríðarlegt forvarnargildi fyrir börn sem alast upp og búa á ofbeldisheimilum. Við teljum að hagsmunir þeirra séu mjög brýnir.“