Pitbull flytur HM-lagið með Jennifer Lopez

Alþjóðaknattspyrnusambandið, FIFA, tilkynnti í dag að We Are One (Ola Ola) í flutningi þeirra Pitbull og Jennifer Lopez verði opinbert lag HM 2014 í Brasilíu.

Brasilíska söngkonan Claudia Leitte er einnig einn flytjanda lagsins en það verður gefið út síðar á þessu ári.

„Ég trúi því af fullri einlægni að þessi frábæra íþrótt og kraftur tónlistarinnar muni sameina okkur. Við erum best þegar við stöndum saman,“ sagði Pitbull við þetta tilefni.

Shakira flutti síðasta HM-lag, Waka Waka, sem var gefið út fyrir keppnina í Suður-Afríku fyrir fjórum árum síðan við miklar vinsældir um allan heim.

Pitbull, Lopez og Leitte munu auðvitað flytja lagið á opnunarhátíð HM á Arena de Sao Paulo þann 12. júní næstkomandi.