Hörður: Ég kalla Laugardalsvöll Gryfjuna

„Þetta var alvöru lið sem við mættum í dag og mjög erfitt en við sinntum góðri varnarvinnu og nældum í gott markalaust jafntefli," segir Hörður Björgvin Magnússon en hann hafði á nægu að snúast í bakverðinum gegn Dönum í dag.

„Við leyfðum þeim ekki að gera neitt á miðsvæðinu. Þeir áttu nokkra krossa en við átum þá. Þeir voru orðnir pirraðir enda ekki verið að spila gegn liðum sem spilar svona góða vörn á móti þeim. Þeir hafa verið að skora að vild og leikir þeirra nánast eins og handboltaleikir."

Bakvörðurinn var ánægður með að Ísland hefði náð þeim úrslitum sem stefnt var að en liðið ætlar sér stærri hluti á heimavelli.

„Það er mjög fínt að fá 0-0 hérna og næst er það bara Laugardalsvöllur eða Gryfjan eins og ég kalla völlinn," segir Hörður og glottir.

„Við getum gert ýmislegt í Gryfjunni og ætlum að bæta okkar leik enn frekar."