Kennir lasergeislanum um tapið

Fabio Capello, þjálfari Rússlands, var æfur út í stuðningsmenn Alsír sem beindu grænum lasergeisla að Igor Akinfeev, markmanni rússneska landsliðsins í leik liðanna í gær.

Rússland þurfti á sigri að halda gegn Alsír til þess að bóka sæti sitt í 16-liða úrslitum. Allt annað en sigur þýddi að Rússarnir væru á leiðinni heim.

Rússar komust yfir snemma leiks með marki Aleksandr Kokorin en Islam Slimani jafnaði metin með umdeildu marki í seinni hálfleik. Akinfeev í marki Rússlands missti af fyrirgjöf og var eftirleikurinn auðveldur fyrir Slimani sem skallaði boltann í autt netið.

Stuttu áður en fyrirgjöfin kom fyrir markið beindust myndavélarnar að Akinfeev og var augljóst að einhver var að trufla hann með lasergeisla.

„Lasergeislinn blindaði hann í markinu. Það er auðsjáanlegt á myndunum frá leiknum, þetta er ekki afsökun heldur staðreynd,“ sagði Capello en þjálfari Alsír, Vahid Halilhodzic, kannaðist ekki við slíkt.

„Ég er að heyra þetta í fyrsta sinn. Ég er ekki búinn að sjá þetta svo ég vill ekki segja mína skoðun strax en þetta gefur fólki tækifæri til að tala um eitthvað yfir mótinu. Við ætlum að einbeita okkur að því að við erum komnir áfram og getum spilað enn betur gegn Þýskalandi í næsta leik,“ sagði Vahid.