Wilmots varar við vanmati

Marc Wilmots, landsliðsþjálfari Belgíu, minnti leikmenn belgíska landsliðsins á að vanmeta ekki bandaríska liðið fyrir leik liðanna í 16-liða úrslitum Heimsmeistarakeppninnar.

Belgar unnu alla þrjá leiki sína í H-riðlinum og eru miklar væntingar gerðar til liðsins. Liðið mætir Bandaríkjunum í 16-liða úrslitum en þrátt fyrir að vera með töluvert sterkara lið á blaði vill Wilmots ekki vanmeta bandaríska liðið.

„Þeir komust áfram úr erfiðasta riðlinum sem sýnir gæði þeirra. Öll liðin sem komin eru í 16-liða úrslitin eiga það skilið og ég tel að það séu helmingslíkur að við komumst áfram,“ sagði Wilmots sem gaf lítið fyrir gagnrýni á lið sitt fyrir að spila ekki fallegan fótbolta.

„Hvað er fallegur fótbolti? Í leik Brasilíu og Króatíu spiluðu heimamenn ekkert sérstaklega en þeir unnu. Það er það sem skiptir máli sama hvaða leikaðferð þú notar. Á Heimsmeistaramóti er þér refsað fyrir öll mistök og það verður að fara varfærnislega,“ sagði Wilmots.