Veðjað á réttan óvin í Sýrlandi

Walid Múallem, utanríkisráðherra Sýrlands, sagði í gær að sýrlenski herinn væri þess albúinn að vinna með alþjóðlegum hersveitum gegn vígasveitum Íslamska ríkisins, sem náð hafa stórum svæðum á sitt vald bæði í Sýrlandi og nágrannaríkinu Írak.

Hann tók hins vegar skýrt fram að Sýrlendingar ætlist til þess að Bandaríkin, sem gert hafa loftárásir á Íslamska ríkið í Írak, fái samþykki hjá Sýrlandsstjórn áður en gerðar yrðu loftárásir á Sýrland.

„Brot gegn fullveldi Sýrlands væru árásarhernaður,“ sagði hann á blaðamannafundi sem hann efndi til í Damaskus í gær.

Fari svo að Bandaríkin og jafnvel fleiri Vesturlönd taki höndum saman við sýrlenska herinn og ráði jafnvel á endanum niðurlögum Íslamska ríkisins í Sýrlandi, og þá væntanlega í Írak líka væri Bashar al Assad Sýrlandsforseti búinn að tryggja stöðu sína ansi kyrfilega.

Margt bendir meira að segja til þess að hann hafi í upphafi veðjað á þessi málalok, og beinlínis leyft vígasveitum Íslamska ríkisins, eins og þær heita nú, að hreiðra um sig að mestu óáreittar í norðausturhluta landsins.

Þar með hafi Íslamska ríkið getað einbeitt sér að því að berjast við aðrar og hófsamari uppreisnarsveitir, sem börðust gegn Assad forseta.

Vesturlönd höfðu hins vegar veðjað á þessar hófsamari uppreisnarsveitir, en þær öflugustu þeirra nefndu sig Frjálsa sýrlenska herinn, og vonast til þess að þeim tækist á endanum að steypa Assad af stóli.

„Þetta er útpælt, að útrýma Frjálsa sýrlenska hernum og þá stæðu eftir tvö andstæð öfl í Sýrlandi, nefnilega Assad og Íslamska ríkið,“ hefur Maria Abi-Habib, blaðamaður á Wall Street Journal, eftir Issat Sjabander, fyrrverandi þingmanni í Írak, en hann er bæði náinn ráðgjafi Núrís al Malíkis, fyrrverandi Íraksforseta, og bandamaður Assads Sýrlandsforseta.

„Nú biður stjórn Assads um aðstoð heimsbyggðarinnar, og heimsbyggðin getur ekki neitað,“ segir Sjabander.