"Þetta er ennþá í fullum gangi"

Jarðskjálfti upp á 5,7 í Bárðarbungu í nótt er sá langsnarpasti frá upphafi skjálftahrinunnar og annar stór skjálfti, upp á 4,6, varð rétt fyrir hádegi. Vísindamenn flugu með TF SIF yfir óróasvæðið í dag en ekkert nýtt var að sjá á yfirborðinu.

Seinni skjálftinn fannst alla leið til Akureyrar en þess fyrri varð ekki vart í byggð, þótt hann væri stærri. „Þetta var óvenjustór skjálfti miðað við að vera ekki á suðurlandsskjálftabeltinu eða norðurlandsskjálftabeltinu,“ segir Oddur Sigurðsson, jarðfræðingur á Veðurstofu Íslands. „Þetta er með stærstu skjálftum sem verða í eldgosabeltinu.“

Þegar við hittum Odd var hann nýkominn úr fluginu með TF SIF, þar sem tökumaður Stöðvar 2 var með í för. Oddur segir vélina ómissandi áhald fyrir vísindamenn. „Því við sjáum það sem er að gerast og ef það verða breytingar á jörðinni, hvernig sem veðrið er.“

Í meðfylgjandi myndskeiði úr fréttum Stöðvar 2 sýnir Friðrik Höskuldsson, stýrimaður á TF SIF, hvaða búnaður er um borð í vélinni, en í hefðbundnu um það bil fimm tíma flugi safnar búnaður hennar um 60 gígabætum af gögnum sem vistast á harðan disk vélarinnar.

Vísindamenn funduðu í morgun og áfram er fylgst vel með stöðunni í Bárðarbungu og nágrenni hennar. „Ég læt alveg eiga sig að spá fyrir um framhaldið en þetta er ennþá í fullum gangi,“ segir Oddur.