Sérsveitarmenn keyrðu rúma 250 kílómetra til Þórshafnar

Sjö lögreglumenn, þar af þrír sérsveitarmenn frá Akureyri og tveir frá Húsavík tóku þátt í að handtaka mann sem hafði gengið vopnaður um götur Þórshafnar í morgun. Sérsveitarmennirnir þurftu að keyra 250 kílómetra í mikilli þoku og á hálum vegum til að komast til Þórshafnar.

Samkvæmt upplýsingum frá lögreglunni á Þórshöfn gekk maðurinn um þorpið vopnaður haglabyssu upp úr klukkan sjö í morgun. Hann var svo handtekinn á heimili sínu á milli ellefu og hálf tólf, eftir að þrír sérsveitarmenn frá Akureyri keyrðu til Þórshafnar auk annarra lögreglumanna frá Húsavík. Það tók sérsveitarmennina langan tíma að keyra á milli staða vegna færðar og aðstæðna.

Alls tóku sjö lögreglumenn þátt í handtökunni, sem gekk vel fyrir sig að sögn lögreglunnar og sýndi maðurinn ekki mótþróa. Tveir starfandi lögreglumenn eru á Þórshöfn og nánast alltaf einn þeirra á vakt.

Eftir að tilkynnt var að maðurinn væri vopnaður á vappi, fór hann heim til sín, en lögreglan á Þórshöfn beið liðsauka og lokaði nærliggjandi götum.

Á vefnum mbl.is segir að maðurinn hafi áður komið við sögu lögreglu og á eigi við vímuefnavanda að stríða. Maðurinn er nú í fangageymslum lögreglunnar á Húsavík og málið er í rannsókn.