Formaður VR hvetur félagsmenn til að samþykkja kjarasamning og mælir með sveppasúpu

Stjórn VR hvetur félagsmenn sína til að samþykkja nýgerðan kjarasamning. Formaður félagsins segir samninginn fela í sér tækifæri og fylgst verði grannt með því að fyrirtæki hækki ekki vöruverð. Nú hljóti allir að borða sveppasúpu eftir að Flúðasveppir tilkynntu að fyrirtækið ætlaði ekki að hækka verð á sinni vöru.

Félagsmenn verkalýðsfélaganna sem skrifuðu undir skammtíma kjarasamning skömmu fyrir áramót greiða atkvæði um samninginn á næstu vikum. Á stjórnarfundi Verslunarmannafélags Reykjavíkur, VR, í gærkvöldi var samþykkt að skora á félagsmenn að samþykkja samninginn. Ólafía B. Rafnsdóttir formaður félagsins segir mikilvægt að hafa í huga að hér sé um að ræða stuttan samning með nýjum vinnubrögðum.

„Við lítum svo á að þessi samningur veiti okkur svigrúm til að undirbúa langtímasamning sem á að stuðla að efnahagslegum stöðugleika og varanlegri kaupmáttaraukningu,“ segir Ólafía.

Fimmtán fulltrúar sitja í stjórn VR og var ályktun félagsins í gærkvöldi samþykkt af fjórtán þeirra, en Ragnar Þór Ingólfsson greiddi einn atkvæði á móti. Hann hefur lýst því yfir að verðbólga þurrki út þá 2,8 prósenta almennu launahækkun sem felst í samningnum, en að auki fær fólk með mánaðarlaun undir 265 þúsund krónum tæplega tíu þúsund króna hækkun á laun sín.

„Okkar verkefni er að sjá til þess að fyrirtæki og opinberir aðilar haldi aftur að sér í verðhækkunum. Ef það gengur ekki eftir þá er fyrsta rauða strikið í þessum samningi strax í febrúar,“ segir Ólafía.

Ef markmiðið um 2,5 prósenta verðbólgu náist ekki verði erfið átök í haust þegar menn setjist að samningaborði um langtímasamning. Ólafía segir að vel verði fylgst með að fyrirtæki haldi aftur að verðhækkunum og opinberir aðilar í gjaldskrárhækkunum.

„Svo er það einnig þannig að þessir samningar eru settir í atkvæðagreiðslu sem hefst núna 15. janúar. Félagsmaðurinn ræður endanlegum úrslitum um það hvernig þessi samningur fer,“ segir formaður VR.

Þá feli þessi staða einnig í sér tækifæri fyrir þau fyrirtæki í landinu sem vilji stuðla að stöðugleika og auknum kaupmætti.

„Flúðasveppir tóku þá ákvörðun í gær að lýsa því yfir að hækka ekki hjá sér. Og það var mjög áhugaverður fundur sem ég var á í morgun þar sem fundarmenn ræddu hvort ekki yrði sveppasúpa í matinn hjá þeim á næstu dögum. Þetta eru bara tækifæri sem fyrirtæki verða að líta til,“ segir Ólafía B. Rafnsdóttir.