Hvers vegna raka konur sig að neðan?

Nauðrakstur á skapahárum er orðið hið hefðbundna viðmið þegar kemur að skapahárasnyrtingu ungra kvenna. Helstu ástæður fyrir rakstrinum eru hreinlæti og aukin ánægja.  Margt bendir þó til þess að utanaðkomandi þrýstingur og samfélagsleg viðmið hafi áhrif á þessa ákvörðun kvenna. Þetta kemur fram í rannsókn sem gerð var af Hildi Friðriksdóttur, meistaranema í félagsvísindum við Háskólann á Akureyri.

Tekin voru opin viðtöl við átta konur á aldrinum 20-36 ára, sem allar höfðu reynslu af því að fjarlægja öll skapahárin.  Fáar rannsóknir hafa verið gerðar um líkamshárarekstur kvenna, en að sögn Hildar rennir það stoðum undir það hversu rótgróin og viðtekin sú hugmynd er að kvenleiki og líkamshár fari ekki saman.

„Það var mjög augljóst hjá yngri hópnum að þetta er í raun orðið normið og ákveðinn hluti af því að verða fullorðinn. Hluti af því að verða kynþroska að taka af sér öll hárin. Þær sögðu þetta gefa meiri nánd í kynlífi en aðspurðar hvort þær hefðu einhvern samanburð svöruðu þær allar neitandi,“ segir Hildur í samtali við Vísi.

„Þegar maður fór að kafa dýpra í hlutina þá kom það meira og meira í ljós að það er alls konar utanaðkomandi þrýstingur eða utanaðkomandi ástæður sem liggja þarna að baki, almenningsálit og annað. Þær sögðust allar vera mjög meðvitaðar þegar þær fara í almenningssturtu og þeim þykir óþægilegt að fara ósnyrtar í sund. Þá sér maður að þetta er orðin viðtekin venja og ákveðin krafa að konur séu mjög vel snyrtar að neðan.“

Það sem kom Hildi hvað mest á óvart við vinnslu rannsóknarinnar var neikvætt viðhorf kvennanna í garð líkamshára. „Þær nefndu flestar hreinlæti. En þá veltir maður fyrir sér – hvað er óhreint og ógeðslegt við hár? Það komu oft upp neikvæð, ljót og gildishlaðin orð eins og „frumskógur af hárum, ljót kúla af hárum“ eða annað neikvætt viðhorf.“ 

Hildur mun kynna rannsóknina á Þjóðarspeglinum í Háskóla Íslands á föstudaginn.