Mestu flóð í áratugi

Björgunarsveitir keppast nú við að koma hundruðum þúsunda manna til bjargar eftir gríðarleg flóð í Pakistan og á Indlandi. Í Pakistan er ástandið verst í Punjab héraði þar sem fjölmargar ár hafa flætt yfir bakka sína eftir miklar rigningar sem dunið hafa á héraðinu síðustu daga.

Í þeim hluta Kashmír sem Indverjar stjórna er höfuðborgin Srinagar svo gott sem á kafi og íbúar um alla borg hafast nú við á húsþökum og bíða þess að verða bjargað. Flóðin hafa nú staðið í viku og staðfest dauðsföll af þeirra völdum eru að minnsta kosti tvöhundruð og áttatíu. Forsætisráðherra Indverja, Narendra Modi, segir að um algjörar hamfarir sé að ræða.

Í Pakistan er staðan síst skárri, hundruð þúsunda eru á vergangi og þúsundir bygginga eru skemmdar. Auk þess eru stór landbúnaðarsvæði komin undir vatn og útséð um uppskeru á þeim á næstunni.Rigningunni hefur enn ekki slotað og óttast veðurfræðingar að flóðin eigi eftir að færast í aukana í Sindh héraði í Pakistan, sem hingað til hefur sloppið að mestu.