Liðsmenn IS biðja um aðstoð til að komast heim

Tugir breskra liðsmanna IS í Sýrlandi hafa beðið um aðstoð til að komast aftur heim til Bretlands. „Við komum ekki hingað til að taka þátt í þessu,“ segir örvæntingarfullur liðsmaður IS í samtali við The Times.

Maðurinn, sem segist koma fram fyrir hönd þrjátíu Breta í vígasveitum IS, hafði nýverið samband við ICSR í Lundúnum, stofnun sem rannsakar róttækar hreyfingar og það umhverfi sem þær starfa í.

Að sögn mannsins höfðu þeir farið til Sýrlands til þess að berjast gegn Bashar al-Assad Sýrlandsforseta og hersveitum honum hliðhollum, en hafa nú þurft að eiga í átökum við aðra uppreisnarhópa í landinu. Óánægjan hafi því farið stigvaxandi meðal Bretanna.

„Við fórum hingað til að berjast gegn stjórninni, ekki til að taka þátt í gengjastríði. Það var ekki ástæða þess að við komum hingað. En ef við yfirgefum landið og förum heim endum við í fangelsi – eða þá verðum við að verða eftir og stríða. Hvaða möguleika höfum við,“ spyr hann The Times.

Um 500 breskir ríkisborgarar hafa farið til Sýrlands og Íraks til að berjast í vígasveitum IS, en fjöldi Svía, Norðmanna, Dana auk annarra frá Vesturlöndum hafa einnig gengið til liðs við samtökin.

Í frétt norska blaðsins Dagbladet kemur fram að norska utanríkisráðuneytinu hafa einnig borist fyrirspurnir frá norskum liðsmönnum IS sem vilja komast aftur heim til Noregs. Í fréttinni segir að það sé í raun ómögulegt fyrir norsk yfirvöld að aðstoða þá sem hafa gengið til liðs við IS að koma sér út úr Sýrlandi. „Þeir verða að koma sér til Tyrklands fyrst,“ segir Dagbladet.

Guardian segir frá því að margir þeirra ungu karlmanna sem taka þá ákvörðun að ferðast frá Vesturlöndum til Sýrlands og ganga til liðs við IS hafa aldrei haldið á vopni þegar þeir koma þangað. Fara þeir í gegnum mánaðar langt námskeið þar sem þeir læra íslamskar kennisetningar, vopnaburð og að taka upp lífsstíl sem flestir þeirra munu nokkurn tímann sleppa frá.