Nýjar þvinganir ESB taka gildi á morgun

Talsmaður ESB segir að nýjar viðskiptaþvinganir sambandsins gegn Rússum verði brátt samþykktar og taki gildi á morgun. Þó væri mögulegt að draga hinar nýju viðskiptaþvinganir til baka, en slíkt færi þó eftir þróun mála í austurhluta Úkraínu.

Vopnahlé í austurhluta Úkraínu hefur að mestu haldið, þó að eitthvað hafi verið um skotárásir. Petró Pórósjenkó sagði aðskilnaðarsinna hafa sleppt 1.200 föngum fyrr í dag, en um það var samið við gerð samningsins um vopnahlé.

Dmitri Medvedev, forsætisráðherra Rússlands, hafði áður sagt að til greina kæmi að banna vestrænum flugfélögum að fljúga yfir Rússland, ákveði Vesturlönd að grípa til nýrra viðskiptaþvingana.

Petró Pórósjenkó Úkraínuforseti er nú í hafnarborginni Mariupol sem aðskilnaðarsinnar ráða nú að hluta yfir. „Við munum ekki afhenda neinum þetta úkraínska landsvæði,“ sagði Pórósjenkó á Twitter í tilefni af heimsókn sinni til Mariupol.

Áætlað er að um 2.600 manns hafi fallið í átökum úkraínska stjórnarhersins og hersveitum aðskilnaðarsinna frá því að átök hófust í aprílmánuði.

Talið er að nýjar viðskiptaþvinganirnar muni beinast að nokkrum ríkisreknum olíufyrirtækjum, svo sem Rosneft og undirfyrirtækjum Gazprom. Þvinganirnar ná þó ekki til gasfyrirtækisins Gazprom sjálfs, en Gazprom flytur inn gríðarlegt magn gass til aðildarríkja ESB.

Þá hyggst ESB einnig frysta eignir 24 Rússa til viðbótar og meina þeim inngöngu til ESB.