Níu leikmenn AZ nældu í stig | Aron skoraði

Íslendingaliðið AZ Alkmaar lenti í því í kvöld að missa tvo menn af velli með rautt spjald eftir aðeins 19 mínútur gegn Roda. Þrátt fyrir það var AZ næstum því búið að vinna leikinn.

Mattias Johansson kom AZ yfir á 25. mínútu og Aron Jóhannsson skoraði svo frábært mark rétt fyrir hlé. Í millitíðinni hafði Roda jafnað leikinn.

Mark Arons dugði næstum því til sigurs en Roda náði að jafna leikinn í blálokin og tryggja sér stig. Aron spilaði í 78 mínútur en Jóhann Berg Guðmundsson spilaði allan leikinn fyrir AZ sem er í öðru sæti deildarinnar.

Guðlaugur Victor Pálsson spilaði allan leikinn fyrir NEC Nijmegen sem tapaði 2-1 fyrir Cambuur. NEC situr á botni hollensku úrvalsdeildarinnar.