Aðeins 1.500 miðar eftir á landsleikinn

Aðeins 1.500 miðar eru eftir á leik Íslands og Albaníu í undankeppni heimsmeistaramótsins sem fram fer á Laugardalsvelli á morgun. Alls komast 10 þúsund manns á leikinn en að sögn Þóris Hákonarsonar, framkvæmdastjóra Knattspyrnusambands Íslands, er þegar búið að selja um 8.500 miða.

„Það er bara allt að vera uppselt,“ segir Þórir.

Eins og fram hefur komið á íslenska liðið í harðri baráttum um sæti í lokakeppni heimsmeistaramótsins sem fram fer í Brasilíu á næsta ári. Íslenska liðið gerði jafntefli við Sviss á útivelli um síðustu helgi þar sem Jóhann Berg Guðmundsson fór á kostum og skoraði þrjú mörk.

Sviss er efst í riðlinum með fimmtán stig en Ísland á í harðri baráttu við Noreg og Albaníu um annað sætið.

Öll liðin í riðlinum eiga þrjá leiki eftir. Ísland á eftir leiki við Kýpur á heimavelli og Noreg á útivelli.

Miða á landsleikinn má nálgast hjá miða.is.