Tvöfaldur Íslandsmeistari: „Þetta er alltaf jafn gaman“

Kári Jónsson varð í gær Íslandsmeistari í mótocrossi þegar síðasta mót ársins fór fram í Bolöldu. Kári er því tvöfaldur Íslandsmeistari í ár en hann sigraði líka Íslandsmótið í Enduro, sem verður að teljast ansi góður árangur hjá þessum tuttugu og sex ára mótorhjólakappa.

Titillinn í mótocrossinu var hans fyrsti á ferlinum, en hann hefur sigrað í enduro-flokknum sex sinnum áður.

„Þetta er alltaf jafn gaman," segir Kári glaðbeittur í samtali við Vísi. Hann segir að æfingin skipti rosalega miklu máli enda sé mikið álag allt sumarið. „Það skiptir miklu máli að æfa vel og koma vel undirbúinn inn í tímabilið. Það þarf líka að halda hausnum góðum út allt tímabilið. Tímabilið byrjar í maí og lýkur núna í september. Það eru fimm keppnir í mótocrossinu og átta umferðir í enduro-flokknum," segir hann.

Í mótocrossi er keyrt í hringi tvisvar í tuttugu mínútur þar sem áherslan er á tækni og stökk. Enduro er þolakstur þar sem farið er langa vegalengd í einn og hálfan tíma, tvisvar.

Aðspurður hvort að hann ætli að hætta núna á toppnum, segir Kári: „Nei, það tekur því ekki. Sá flokkur sem hefur verið hvað öflugastur síðustu ár er 40+ flokkurinn, svo ég á fullt eftir," segir tvöfaldi Íslandsmeistarinn hress að lokum.

Nánar um keppnina í gær má lesa inni á vefnum Motocross.is.